අධිකරණයට අපහාස කළේ යැයි චෝදනා කරමින් දැනට සිරදඬුවම් විදින හිටපු අමාත්‍ය රන්ජන් රාමනායක මහතාට එරෙහිව ගොනුකර තිබෙන දෙවන පැමිණිල්ල මාර්තු මස 09 වනදා යළි කැඳවන ලෙස ශ්‍රේෂ්ඨාධිකරණය නියම කළේය. එම පැමිණිල්ල අද (24) එස් තුරෙයි රාජා , යසන්ත කෝදාගොඩ සහ ඒ.එච්.එම්.ඩී නවාස් යන මහත්වරුන්ගෙන් සමන්විත ශ්‍රේෂ්ඨාධිකරණ විනිසුරු මඩුල්ල ඉදිරියේ කැඳවනු ලැබීය.
එහිදී රංජන් රාමනායක මහතා වෙනුවෙන් පෙනී සිටි නීතිඥ අශාන් ප්‍රනාන්දු මහතා අධිකරණය හමුවේ ඉල්ලීමක් කරමින් එම නඩුව කැඳවීම සඳහා දිනයක් ලබාදෙන ලෙස ඉල්ලා සිටියේය. එම ඉල්ලීම සලකා බැලූ ත්‍රිපුද්ගල විනිසුරු මඩුල්ල පැමිණිල්ල නැවත මාර්තු මස 09 වනදා කැඳවන ලෙස නියම කළේය.
මෙහිදී විනිසුරු තුරෙයි රාජා මහතා මතු කළ ප්‍රශ්නයකට පිළිතුරු දුන් රන්ජන් රාමනායක මහතා වෙනුවෙන් පෙනී සිටි නීතිඥවරයා තම සේවාදායකයාට බන්ධනාගාරය තුළදී මාර්ගගත ක්‍රමවේදයට අධ්‍යයන කටයුතුවල නිරත වීම සඳහා අවස්ථාව සැලසී ඇති බව දන්වා සිටියේය.
2018 වසරේ එවක ජනාධිපති මෛත්‍රිපාල සිරිසේන මහතා විසින් පාර්ලිමේන්තුව විසුරුවා හැරීමට ගත් තීරණය අභියෝගයට ලක් කරමින් ගොනුකර තිබූ මූලික අයිතිවාසිකම් පෙත්සම් විභාග කළ පංච පුද්ගල විනිසුරු මඩුල්ල පිළිබඳව රූපවාහිනී වැඩසටහනකදී රන්ජන් රාමනායක මහතා දැක්වූ අදහස්වලින් අධිකරණයට අපහාසයක් සිදු වී ඇති බව සඳහන් කරමින් අධිකරණයේ රෙජිස්ට්‍රාර්වරයා විසින් එම පැමිණිල්ල ඉදිරිපත් කර තිබුණි. source-derana
52 total views, 4 views today